موسى: «إزاي المتآمر أحمد ماهر يخرج والريس مبارك في السجن؟»

قال الإعلامي أحمد موسى، تعقيبًا على انتهاء عقوبة حبس الناشط السياسي أحمد ماهر، مؤسس حركة 6 أبريل، بعدما أتم 3 أعوام في منطقة سجون طرة، في القضية المسماة إعلاميًا بـ«أحداث محكمة عابدين»، التي وقعت في 2013؛ «ماهر مؤسس حركة إرهابية، وبيقولوا إنه خلص مدته وهيخرج، وأنا بسأل: هي فين القضية 250؟ هي فين البلاغات الموجودة لدى جهات التحقيق؟ هو فين التمويل اللي الناس دي أخدته؟ فين قضايا التخابر؟».

أضاف موسى، خلال تقديمه برنامج «على مسئوليتي»، عبر فضائية «صدى البلد»، «أحمد ماهر بقاله 3 سنين محبوس ومحدش قادر يحرك قضية ولا يفتح تحقيق؟ وبعد يومين محمد عادل اللي سرق الهاردات والملفات بتاعت أمن الدولة هو كمان يخرج، دي في إعلاميين أخدوا ملفات معاهم البيوت، فين الكلام ده؟ إزاي لم نجد حتى الآن قضية واحدة حُركت، هذه أمور كلها يُعاقب عليها القانون، فين القضايا؟ إزاي ماهر ده يخرج والرئيس مبارك في السجن؟ ده واحد مخرب ومتآمر، لما يخرج النهاردة يبقى بيطلع لسانه لـ90 مليون».

تابع: «نفسي جهة قضائية تقول أين هي القضية 250 أمن الدولة (المعروفة بقضية التمويل الأجنبي)؟ دي فيها كل الأدلة والتسجيلات، طيب إيه اللي ناقص؟ أنا عارف اسم كل واحد في القضية، ده كلنا نعلم جرائم أحمد ماهر وجرائم 6 أبريل، الرأي العام هو صاحب القرار، الشعب مش هيسكت لما يلاقي الخونة دول برة، وهل أحمد ماهر ممنوع من السفر ولا لاء؟ هتخرجوه النهاردة وهيسافر بكرة، إحنا دولة قانون، ولا أحد فوق القانون، ويجب أن يتم فتح القضية 250، ونعلم سيادة الرئيس أنك لا تحمي أحدًا وأنك مع دولة القانون، لأنه لا يجب أن يتم قفل هذه القضية ولا الطرمخة فيها أبدًا».

وكانت مأمورية من مديرية أمن القاهرة تسلمت أحمد ماهر، الناشط السياسى من منطقة سجون طرة، ورحلته لقسم شرط عابدين التابع له محل الواقعة، لإتمام إجراءات إخلاء سبيله في قضية «أحداث محكمة عابدين»، والتي أنهى فيها عقوبة الحبس 3 سنوات.

المصدر أخبار | التحرير الإخبـاري